Informashon pa institushonnan finansiero
Obligashonnan den kuadro di DGS ora sierto kambio tuma lugá
Introdukshon
Kambio manera fushon, atkisishon i salida for di merkado por tin efekto riba e manera ku ta implementá e protekshon di depositante konforme e sistema di garantia di depósito (DGS) pa Kòrsou:
- Ora un instituto di krédito sali for di sektor finansiero di Kòrsou, e kontribushonnan ku el a paga kaba ta keda forma parti di e Fundashon pa fondo di garantia di depósito (DGF). No ta restituí kontribushon.
- Ora un instituto di krédito na Kòrsou ku ta kai bou di kobertura di DGS haña su lisensia, e mester kuminsá paga e kontribushon básiko na e fondo DGF for di e fecha ku Centrale Bank van Curaçao en Sint Maarten (CBCS) otorg’é su lisensia.
- Ora dos (òf mas) instituto di krédito fushoná, òf ora un instituto di krédito ku ta kai bou di kobertura di DGS Kòrsou atkerí un otro instituto di krédito, e kontribushonnan akumulá di ámbos instituto ta keda kombiná den e fondo.
- Den kaso ku (parti di) e depósitonan garantisá ser transferí di un instituto di krédito partisipante pa un otro, e kontribushonnan básiko ku nan a paga kaba ta keda den e fondo DGF. Ku otro palabra, e instituto di krédito ku a atkerí e kuentanan no tin ku paga kontribushon básiko adishonal riba e depósitonan si a paga kontribushon riba nan kaba den e periodonan anterior, i e instituto di krédito ku a bende e kuentanan no ta risibí restitushon.