Informashon pa institushonnan finansiero
Kontribushon na Fondo di Garantia di Depósito (DGF)
Kontribushon na Fondo di Garantia di Depósito (DGF)
E Sistema di Garantia di Depósito (DGS) pa Kòrsou ta ser finansiá via fondo akumulá di antemano (ex ante) den un Fondo di Garantia di Depósito (DGF).
Den un periodo di dies aña, lo akumulá kontribushon anual di e institutonan di krédito ku ta kai bou di e kobertura. E meta ta pa DGF akumulá un fondo na un montante di 7% di tur e depósitonan garantisá.
Si DGS tin ku duna depositante sèn bèk i no tin sufisiente fondo pa finansiá e pagonan, por imponé kontribushon èkstra posteriormente (ex post) i optené finansiamentu di tersero pa kubri e défisit.
Kontribushon anual básiko
E institutonan di krédito kubrí na Kòrsou ta kontribuí na DGF pagando un prima anual ku ta sirbi pa akumulá e fondo DGF di antemano (ex ante). Ta kalkulá e kontribushonnan akí konforme e legislashon aplikabel i a base di e volúmen di depósito garantisá di kada instituto di krédito (konosí tambe komo nan ‘base di depósito’). E ophetivo fihá den legislashon ta pa e fondo DGF yega un nivel di 7% di e total di depósito garantisá, den un plaso di dies aña.
Kada aña, promé ku dia 1 di mei, Centrale Bank van Curaçao en Sint Maarten (CBCS), komo e entidat enkargá ku atministrashon di e sistema DGS, ta fiha e kontribushon anual básiko ku e institutonan di krédito mester paga. Ta kalkulá e kontribushon a base di e suma promedio di depósito garantisá ku e instituto tin na fin di kada kuartal. Por inkluí un faktor di korekshon i un faktor di ponderashon di riesgo den kálkulo di e kontribushon básiko. E foyeto akí ta duna un bista di e manera ku ta kalkulá e kontribushon anual básiko.
Kontribushon èkstra (ex post)
Si DGF no tin sufisiente fondo pa paga e depositantenan konforme e sistema DGS, CBCS lo imponé kontribushon èkstra riba e institutonan di krédito ku keda. Ademas, CBCS por pidi e institutonan hasi sierto pago adelantá, pa asina optené e fondonan nesesario pa kumpli ku e plaso di 20 dia di trabou denter di kua mester duna e depositantenan nan sèn bèk. E foyeto akí ta duna un splikashon mas detayá tokante kon lo fiha i kobra e kontribushonnan èkstra i posibel pagonan adelantá den kaso ku DGS tin ku duna depositante nan sèn bèk.
Finansiamentu di tersero
Si DGF falta fondo pa por paga e depositantenan bou di e sistema DGS i kontribushon èkstra lo no ta sufisiente òf lo no bira disponibel na tempu, DGF por optené finansiamentu (temporal) di tersero pa kubri e défisit.
Downloads
(19 november 2024 | 295KB PDF)
Foyeto Kontribushon annual básiko
(19 november 2024 | 216KB PDF)