FAQ
Pregunta Frekuente
E ta un sistema pa garantisá ku sèn riba kuenta di banko, fondo di spar i koperativa di krédito ku tin pèrmit di Centrale Bank van Curaçao en Sint Maarten (CBCS) pa hasi negoshi na Kòrsou ta protehá te na un sierto máksimo; Cg 50.000 pa persona na kada banko òf fondo di spar òf Cg 25.000 pa persona na kada koperativa di krédito.
Nò, nada. No ta nesesario pa bo registrá ni duna bo nòmber niun kaminda. Si bo tin sèn na un banko, fondo di spar òf koperativa di krédito na Kòrsou, e garantia ta konta pa bo outomátikamente.
Bo por chèk riba e página Kua ta e bankonan, fondonan di spar i koperativanan di krédito? Si bo ta duda, puntra bo banko, fondo di spar òf koperativa di krédito si bo sèn ta garantisá pa DGS Kòrsou. Bankonan internashonal no ta den e protekshon ku DGS Kòrsou ta brinda
Centrale Bank van Curaçao en Sint Maarten (CBCS), huntu ku Fundashon pa fondo di garantia di depósito (DGF), ta enkargá ku implementashon di DGS Kòrsou.
E sistema di garantia di depósito ta konta pa tur doño di kuenta, tantu adulto komo menor di edat, tantu individuo komo negoshi, fundashon i demas organisashon sin meta komersial. E úniko eksepshon ta instituto finansiero, pasobra nan kuentanan sí no ta kai bou di e protekshon ku DGS Kòrsou ta brinda.
Sí, e garantia ta konta pa kuenta di negoshi tambe. E foyeto tin mas informashon.
Sí, e sistema di garantia di depósito ta konta pa kada persona, na kada banko, fondo di spar òf koperativa di krédito. Edat no ta hunga un ròl. Ku otro palabra, si un menor di edat tin sèn riba kuenta na banko, fondo di spar òf koperativa di krédito, esei tambe ta garantisá pa DGS Kòrsou.
DGS Kòrsou ta protehá e siguiente tiponan di depósito: sèn riba kuenta koriente òf di spar, depósito na plaso fiho, saldo positivo di tarheta di krédito, na banko, fondo di spar i koperativa di krédito ku tin pèrmit di CBCS pa hasi negoshi na Kòrsou.
Pa banko i fondo di spar, e Sistema di Garantia di Depósito ta garantisá te Cg 50.000 pa persona na kada banko òf fondo di spar. Pa koperativa di krédito, e sistema di garantia di depósito ta garantisá te Cg 25.000 pa persona na kada koperativa. E máksimo ta keda meskos sin importá kuantu kuenta apart bo tin na e instituto. E interes ku bo akumulá riba bo kuentanan te dia keda determiná ku e banko, fondo di spar òf koperativa di krédito ta fayit tambe ta inkluí. Si bo tin mas ku un kuenta na un instituto, e suma máksimo garantisá ta konta pa e total di tur e kuentanan ei huntu.
Si e kuenta no ta na bo nòmber so, sino na nòmber di un hende mas tambe, por ehèmpel, den kaso di un kuenta komun (joint account), boso kada un lo risibí parti di e sèn, proporshonalmente.
Por ehèmpel: Si boso tin Cg 100,000 riba boso kuenta komun (joint account), boso kada un lo risibí Cg 50.000. Si bo tin mas kuenta, e máksimo garantisá di Cg 50.000 pa kada persona ta konta pa e total di tur bo propio kuentanan i kuentanan komun (joint account) huntu.
Ora un banko, fondo di spar òf koperativa di krédito bai fayit, CBCS ta revisá e instituto ei su datonan di atministrashon di kliente pa determiná kua ta e kuentanan ku ta kai bou di garantia di DGS Kòrsou. Pa kuenta na otro moneda, CBCS ta traha a base di e tasa di kambio publiká riba su wèpsait riba e fecha ku DGS Kòrsou ser aktivá.
Loke bo debe e instituto ku a bai fayit, no ta ser kitá for di e pago ku lo bo risibí di DGS. Por ehèmpel: Ban bisa ku bo tin un fiansa personal di Cg 5.000 i un kuenta di spar ku Cg 50.000 riba dje na un instituto ku ta kai bou di garantia di DGS Kòrsou. Si bo instituto bai fayit, lo bo risibí Cg 50.000 bèk for di DGS. Bo por puntra e curator ku ta atendé kiebro di e instituto kiko ta pasa ku bo debe di Cg 5.000.
Ku un suma máksimo di garantia di Cg 50.000, mas o ménos 90 porshento di tur kliente lo risibí tur nan sèn bèk. Di e manera akí, DGS Kòrsou ta kumpli ku e normanan internashonal pa un sistema efektivo di garantia di depósito, fihá pa International Association of Deposit Insurers (IADI).
Ku un suma máksimo di garantia di Cg 25.000, mas o ménos 90 porshento di tur kliente lo risibí tur nan sèn bèk. Di e manera akí, DGS Kòrsou ta kumpli ku e normanan internashonal pa un sistema efektivo di garantia di depósito, fihá pa International Association of Deposit Insurers (IADI).
Si un banko, fondo di spar òf koperativa di krédito bai fayit, CBCS lo aktivá DGS Kòrsou mas pronto posibel; en todo kaso, denter di 14 dia di kalènder. Si aktivá DGS Kòrsou pa un instituto ku ta fayit, lo anunsiá esei den e medionan di komunikashon lokal, riba wèpsait di DGS, riba wèpsait di CBCS i den Landscourant.
– For di momento ku un banko, fondo di spar òf koperativa di krédito no ta kapas mas pa paga su klientenan e sèn ku tin riba nan kuenta, CBCS tin 14 dia di kalènder pa disidí si lo aktivá DGS Kòrsou.
– Despues di un desishon di korte ku ta pone ku e klientenan no por mishi ku e sèn ku tin riba nan kuenta. Un ehèmpel di un desishon asina ta kiebro di un banko, fondo di spar òf koperativa di krédito.
Pa mas detaye tokante e kondishonnan pa aktivá e sistema di garantia di depósito, wak na Legislashon.
Si DGS Kòrsou ser aktivá, CBCS lo anunsiá esei riba wèpsait di tantu CBCS komo DGS Kòrsou, den Landscourant i via e medionan di komunikashon lokal. CBCS lo splika kon bo por entregá un petishon pa haña bo sèn bèk te na e suma máksimo garantisá.
For di momento ku DGS Kòrsou ser aktivá, lo bo tin un aña di tempu pa entregá bo petishon. Si bo entregá bo petishon despues ku e plaso ei terminá, CBCS lo prosesá bo petishon basta bo por proba ku e retraso no ta pa bo falta.
Ora CBCS risibí bo petishon, lo kontrolá lo siguiente:
– si bo tin un òf mas kuenta na e banko, fondo di spar òf koperativa di krédito ku ta fayit;
– si bo kuenta(nan) ta kai bou di e garantia ku DGS Kòrsou ta brinda;
– e suma total di sèn ku tin riba tur bo kuentanan na e mesun instituto ei.
Pa mas informashon, wak e foyeto.
Prinsipalmente, CBCS ta usa e datonan di atministrashon di kliente di e banko, fondo di spar òf koperativa di krédito. Si CBCS no ta logra haña sa si bo tin un kuenta, òf si falta informashon nesesario, lo pidi abo presentá informashon/dokumentashon adishonal.
Pa bo por risibí bo sèn bèk serka DGS na tempu, ta importante pa bo banko, fondo di spar òf koperativa di krédito tin bo datonan personal korekto i aktualisá. Si bo no sa sigur si bo datonan ta aktualisá, nos ta rekomendá pa bo tuma kontakto ku bo instituto finansiero i aktualisá bo datonan mas pronto posibel.
Mas pronto posibel; denter di 20 dia di trabou despues di e fecha di bo petishon.
Si boso tin un kuenta komun (joint account), boso kada un lo risibí un parti proporshonal di e sèn. Boso kada un lo tin ku entregá un petishon apart pa risibí boso parti di e sèn bèk serka DGS.
E protekshon ku DGS Kòrsou ta ofresé lo ser finansiá pa e bankonan, fondonan di spar i koperativanan di krédito ku ta kai bou di e sistema di garantia. Fundashon pa fondo di garantia di depósito ta lantando un fondo pa esei i lo maneh’é tambe. Tur aña, kada instituto ku ta kai bou di e sistema di garantia mester kontribuí na e fondo, te ora e yega e suma nesesario pa e sèn di públiko por ta bon protehá. E ophetivo ta pa DGF akumulá un fondo ku ta 7% di e suma total di tur e depósitonan garantisá na tur e institutonan ku ta kai bou di e sistema di garantia.
Si bo tin mas pregunta òf tin mester di mas informashon tokante e protekshon ku DGS Kòrsou ta brinda, tuma kontakto libremente ku CBCS su Bali di Informashon. Yama nos na +599 (9) 434-5500 riba dia di trabou, di 9.00 pa 17.00 òf e-mail nos na [email protected]. Bo por komuniká ku nos na papiamentu, hulandes i ingles.
Bo pregunta no ta den e FAQ (Preguntanan Frekuente)?
Tuma kontakto ku CBCS su Bali di Informashon. E-mail nos na [email protected] òf yama nos na +599 (9) 434-5500 riba dia di trabou, di 9.00 pa 17.00, na papiamentu, hulandes òf ingles.